5 ແນວທາງ ປ່ຽນຄວາມຜ່າຍແພ້ເປັນໄຊຊະນະ

ຄວາມແຕກຕ່າງລະຫວ່າງຄວາມສຳເລັດ ແລະ ຄວາມຜ່າຍແພ້ ຈະພົບໄດ້ໃນທັດສະນະຄະຕິຂອງຕົວເຮົາຕໍ່ຄວາມຜ່າຍແພ້ອຸປະສັກ, ຄວາມທໍ້ຖອຍ ແລະ ຄວາມຜິດຫວັງອື່ນໆ. ມີປ້າຍບອກທາງທີ່ຈະຊ່ວຍໃຫ້ທ່ານສາມາດປ່ຽນຄວາມຜ່າຍແພ້ເປັນໄຊຊະນະນັ້ນຄື:

1. ການສຶກສາຄວາມຜ່າຍແພ້ເພື່ອຈະປູທາງໄປສູ່ຄວາມສຳເລັດ, ເມື່ອທ່ານລົ້ມກໍ່ຄວນຕ້ອງຮຽນຮູ້ ແລະ ເອົາຊະນະໃຫ້ໄດ້ໃນຄັ້ງຕໍ່ໄປ.
2. ມີຄວາມກ້າຫານທີ່ຈະວິຈານຕົວເອງ, ຄົ້ນໃຫ້ພົບຄວາມຜິດພາດ ແລະ ຈຸດອ່ອນຂອງຕົວເອງ ແລ້ວແກ້ໄຂມັນ ສິ່ງນີ້ຈະເຮັດໃຫ້ທ່ານປະສົບຄວາມສຳເລັດ.
3. ຢຸດໂທດໂຊກຊະຕາ ກວດສອບຄວາມຜ່າຍແພ້ໃນແຕ່ລະຄັ້ງ, ຄົ້ນຫາວ່າແມ່ນຫຍັງຄືຄວາມຜິດພາດ ແລະ ຈື່ໄວ້ວ່າການໂທດໂຊກຊະຕາ ຫຼື ບຸນວາດສະໜາບໍ່ເຮັດໃຫ້ໃຜສາມາດໄປເຖິງບ່ອນທີ່ເຂົາຕ້ອງການຈະໄປໄດ້.
4. ປະສົມປະສານຄວາມມານະອົດທົນກັບການທົດລອງ ລອງຜິດລອງຖືກ ຍຶດໝັ້ນກັບເປົ້າໝາຍ ແຕ່ຢ່າມົກໝົ້ນກັບມັນຈົນເກີນໄປ ແລະ ຊອກຫາວິທີການໃໝ່ໆຢູ່ເລື້ອຍໆຖ້າວິທີການທີ່ໃຊ້ໄປບໍ່ໄດ້ຜົນ.
5. ຈື່ໄວ້ວ່າມີດ້ານທີ່ດີຢູ່ໃນທຸກສະຖານະການ ຈົ່ງຊອກຫາ ແລະ ເບິ່ງດ້ານທີ່ດີ ແລະ ຫັນຫຼັງໃຫ້ກັບຄວາມທໍ້ແທ້ ທໍ້ຖອຍ ໝົດຫວັງ.

ຄວາມເຊື່ອທີ່ມີໃນຕົວເຮົາຈະປ່ຽນຄວາມຜ່າຍແພ້ທີ່ກຳລັງປະເຊີນ ແລະ ນຳທາງໄປສູ່ຄວາມມີໄຊຊະນະ.

8 ປະການ ສ້າງນິໄສໃນການລົງມືປະຕິບັດ

ບໍມີໃຜປະສົບຄວາມສຳເລັດ ຫຼື ໄດ້ຮັບການຍ້ອງຍໍເພາະວ່າເຂົາບໍ່ໄດ້ລົບກວນໃຜ, ບໍ່ໄດ້ລົງມືເຮັດຫຍັງ ຫຼື ເຂົາລໍຖ້າຈົນກວ່າຈະມີຄົນມາບອກໃຫ້ເຮັດສິ່ງໃດໜຶ່ງ.
ສະນັ້ນ, ການທີ່ຈະປະສົບຄວາມສຳເລັດໄດ້ຕ້ອງລົງມືເຮັດໃນສິ່ງທີ່ເຮົາເຊື່ອວ່າມັນຈະປະສົບຄວາມສຳເລັດ ດັ່ງ 8 ປະການລຸ່ມນີ້:

1. ຈົ່ງມີຄວາມກະຕືລືລົ້ນ: ເປັນຄົນເຮັດວຽກ, ເປັນນັກທຳ, ຢ່າເອົາມືຊຸກຫີບ.
2. ຢ່າລໍຈົນກະທັ້ງເງື່ອນໄຂຕ່າງໆສົມບູນແບບ, ມັນບໍ່ມີວັນເກີດຂຶ້ນ,​ຈົ່ງປະເຊີນໜ້າກັບຄວາມຫຍຸ້ງຍາກ ແລະ ອຸປະສັກໃນອະນາຄົດ ແລະ ແກ້ໄຂບັນຫາເມື່ອມັນເກີດຂຶ້ນ.
3. ລຳພັງຄວາມຄິດພຽງຢ່າງດຽວບໍ່ເຮັດໃຫ້ເກີດຄວາມສຳເລັດ ແຕ່ຄວາມຄິດຈະມີຄ່າກໍ່ຕໍ່ເມື່ອໄດ້ຮັບການລົງມືປະຕິບັດ.
4. ໃຊ້ການລົງມືປະຕິບັດຊ່ວຍກຳຈັດຄວາມຢ້ານ ແລະ ສ້າງຄວາມໝັ້ນໃຈ, ຈົ່ງເຮັດໃນສິ່ງທີ່ຢ້ານ ແລະ ສິ່ງທີ່ຢ້ານຈະຫາຍໄປ.
5. ຕິດເຄື່ອງຈັກຄວາມຄິດດ້ວຍມື ຢ່າລໍໃຫ້ຈິດໃຈຜັກດັນໃຫ້ເຮັດ ແຕ່ລົງມືເຮັດໄປກ່ອນແລ້ວມັນຈະເປັນແຮງຜັກດັນໃຈໃຫ້ຄິດ.
6. ຄິດໃນເກນຂອງຄຳວ່າດຽວນີ້ ຄຳວ່າມື້ອື່ນ, ມື້ໜ້າ, ອາທິດໜ້າ, ເດືອນໜ້າ ຫຼືຄຳອື່ນໆທີ່ຄ້າຍຄືກັນນັ້ນມັກເປັນຄຳທີ່ຄ້າຍຄື ຫຼື ໃກ້ຄຽງກັບຄຳເວົ້າແຫ່ງຄວາມບໍ່ປະສົບຜົນສຳເລັດ. "ຈົ່ງເປັນຄົນປະເພດດຽວນີ້"
7. ນັ່ງລົງ ແລະ ເຮັດວຽກ ຢ່າເສຍເວລາກຽມຕົວທີ່ຈະເຮັດ ຈົ່ງເອົາເວລານັ້ນມາລົງມືເຮັດດີກວ່າ.
8. ເປັນຜູ້ລິເລີ້ມ, ເປັນນັກລົນນະລົງ, ຕັ້ງແປ້ນຢັນແລ້ວກ້າວຂາອອກແລ່ນ ສະແດງໃຫ້ເຫັນວ່າທ່ານມີຄວາມສາມາດ ແລະ ມີຄວາມທະເຍີທະຍານທີ່ຈະລົງມື.

ຢຽບຄາດ ເຂົ້າເລກ ແລ້ວເລັ່ງອອກໄດ້ເລີຍ!!!

5 ພຶດຕິກຳ ທີ່ເຮັດໃຫ້ຊີວິດບໍ່ປະສົບຄວາມສຳເລັດ

ຄົນຈໍານວນບໍ່ໜ້ອຍທີ່ບໍ່ປະສົບຄວາມສຳເລັດໃນຊີວິດ, ບາງຄົນກໍ່ບໍ່ມີຮອດເປົ້າໝາຍ ບາງຄົນມີເປົ້າໝາຍແລ້ວກໍ່ຕ້ອງປະຖິ້ມໄປລ້າໆ ແຕ່ທີ່ໜ້າເສຍດາຍກໍ່ຄືຄົນທີ່ຍັງອີກພຽງກ້າວດຽວແຕ່ກໍ່ຕ້ອງລົ້ມເລີກໄປໃນທີ່ສຸດ ເຊິ່ງຖ້າຫາກເຮົາຮູ້ຕົວກ່ອນວ່າມີພຶດຕິກຳແນວໃດທີ່ເຮັດໃຫ້ເຮົາບໍ່ປະສົມຄວາມສຳເລັດ ເຮົາກໍ່ຈະສາມາດຫຼີກລ້ຽງ ແລະ ເຮັດໃຫ້ຊີວິດເຮົາດີຂຶ້ນກວ່າເດີມໄດ້ແນ່ນອນຈາກ 5 ພຶດຕິກຳດັ່ງລຸ່ມນີ້.

1.   ຍອມປະລາໄຊຕໍ່ຄວາມຢ້ານ

ເວລາພົບບັນຫາ ຫຼື ເຫດການໃດທີ່ຢູ່ນອກເໜືອການຄວບຄຸມ ຖ້າທ່ານຢ້ານ ແລະ ຫຼີກໜີບັນຫາ ປ່ອຍໃຫ້ສະຖານະການມັນຊຸດໂຊມລົງ ຫຼື ຄອຍຖ້າແຕ່ໃຫ້ຄົນອື່ນມາເຮັດແທນ ທ່ານກໍ່ຈະບໍ່ປະສົບຄວາມສຳເລັດ ຢູ່ແບບນັ້ນຕະຫຼອດໄປ ໃນຄວາມເປັນຈິງສິ່ງທີ່ຄວນເຮັດກໍ່ຄື ຮັບຄວາມສ່ຽງນັ້ນໄວ້ ຈົດຈຳວ່າສິ່ງໃດຄວນເຮັດ ແລະ ບໍ່ຄວນເຮັດ, ຮຽນຮູ້ຈາກຄວາມຜິດພາດ ແລະ ເດີນໜ້າຕໍ່ໄປ ເພາະສິ່ງເຫຼົ່ານີ້ເອງຈະພາທ່ານໄປພົບກັບຄວາມສຳເລັດ.

2.  ຄິດວ່າຕົນເອງຮູ້ທຸກຢ່າງ

ບໍ່ວ່າທ່ານຈະຜ່ານເລື້ອງຮ້າຍດີມາເປັນສິບໆເລື້ອງ, ຮຽນຮູ້ຈາກຄົນເກັ່ງໆມາໄດ້ເປັນຮ້ອຍໆຄົນ ຫຼື ອ່ານປື້ມມາແລ້ວເປັນພັນໆເລື່ອງ ທ່ານກໍ່ຍັງບໍ່ສາມາດຮູ້ໄດ້ທຸກຢ່າງຢູ່ດີ ເພາະຍັງມີເລື້ອງລາວອີກຫຼວງຫຼາຍພາຍມາກທີ່ເຮັດໃຫ້ທ່ານໄດ້ຮຽນຮູ້ຢູ່ຕະຫຼອດເວລາ ແລະ ເຖິງວ່າທ່ານຈະເປັນຜູ້ຊ່ຽວຊານໃນເລື່ອງທີ່ທ່ານກຳລັງເຮັດຢູ່ກໍ່ຕາມ ແຕ່ກໍ່ບໍ່ໄດ້ໝາຍຄວາມວ່າທຸກສິ່ງທຸກຢ່າງຈະເປັນໄປຕາມທີ່ທ່ານຄິດໄວ້ທັງໝົດ ເຊິ່ງນີ້ກໍ່ເປັນໜຶ່ງໃນສິ່ງທີ່ຄອຍ່ວງດຶງເຮັດໃຫ້ທ່ານບໍ່ປະສົບຄວາມສຳເລັດ.

 3.  ຫາຂໍ້ອ້າງ ແກ້ຕົວເປັນປະຈໍາ

ເມື່ອໃດກໍ່ຕາມທີ່ທ່ານເຮັດຜິດ ຍອມຮັບ ແລະ ຮຽນຮູ້ເພາະນີ້ຄືຊີວິດຈິງ ບໍ່ມີຫຍັງທີ່ຈະແນ່ນອນຕາຍຕົວ ຫຼື ຖືກຕ້ອງໝົດທຸກຢ່າງ ເມື່ອມີບັນຫາທ່ານກໍ່ພຽງຫາສາເຫດ ແລະ ວິທີການແກ້ໄຂ ເພື່ອບໍ່ໃຫ້ເກີດຊ້ຳຮອຍເກົ່າອີກ ຖ້າທ່ານມົວແຕ່ຫາຂໍ້ອ້າງ ຄອຍແຕ່ຫາຂໍ້ແກ້ຕົວ ໂດຍທີ່ບໍ່ພະຍາຍາມຫາຕົ້ນປາຍສາຍເຫດ ທ່ານກໍ່ຈະເຮັດຜິດຊ້ຳໆຢູ່ແບບນັ້ນ ບໍ່ມີວັນປະສົບຜົນສຳເລັດໄດ້.

4.  ມີຄວາມຄິດ ແຕ່ບໍ່ເຄີຍລົງມືເຮັດ

ຢ່າລືມວ່າ ຄວາມຄິດ ແລະ ຄວາມຝັນ ຂອງທ່ານເປັນສິ່ງທີ່ເຮັດໃຫ້ທ່ານເດີນທາງມາໄດ້ຈົນເຖິງຈຸດນີ້. ຖ້າທ່ານມີຄວາມຄິດແຕ່ບໍ່ເຄີຍລົງມີເຮັດຕໍ່ໃຫ້ຄວາມຝັນຈະນ້ອຍເທົ່າໃດ ກໍ່ບໍ່ມີທາງເປັນຈິງໄດ້ ເພື່ອຄວາມສຳເລັດໃນອະນາຄົດນັ້ນ ທ່ານຈົງລຸກຂຶ້ນມາຂຽນເປົ້າໝາຍ, ຂຽນແຜນທຸລະກິດ, ຮ່າງວິທີການ ຫາຂໍ້ດີຂໍ້ເສຍ ສິ່ງສຳຄັນຄືການລົງມືເຮັດ ຢ່າພຽງເກັບໄວ້ໃນຄວາມຄິດ.

 5.  ສົນໃຈແຕ່ຄວາມສຳເລັດຂອງຄົນອື່ນ ແຕ່ບໍ່ລົງມືກະທຳຂອງຕົວເອງ

ຄວາມສຳເລັດຂອງຄົນຮອບຕົວ ໝູ່ເພື່ອນ, ຄົນຮັກ ຫຼື ຄູ່ແຂ່ງ ເປັນເໝືອນແຮງກະຕຸ້ນຊັ້ນດີທີ່ຈະເຮັດໃຫ້ເຮົາມີກຳລັງໃຈ ແລະ ນຳພາຕົນເອງໃຫ້ປະສົບຄວາມສຳເລັດຄືກັບພວກເຂົາ ແຕ່ຫຼາຍຄົນມັກເອົາຄວາມສຳເລັດຂອງຄົນອື່ນມາເປັນແຮງກົດດັນໃຫ້ຕົວເອງ ມົວແຕ່ອິດສາລິດສະຫຍາ ສົນໃຈແຕ່ຄົນອຶ່ນຈະພາດບ່ອນໃດ ຈະລົ້ມແນວໃດ ຈະໄປໄດ້ໄກເທົ່າໃດ ໂດຍລະເລີຍເປົ້າໝາຍຂອງຕົນເອງໄປ ເຊິ່ງທຸກຄົນມີຄວາມສາມາດ ແລະ ຄວາມອາດສາມາດຢູ່ໃນຕົວ. ສະນັ້ນ, ຈົ່ງຢ່າມົວແຕ່ເສຍເວລາໃຫ້ກັບຄວາມສຳເລັດຂອງຄົນອື່ນ ຈົ່ງລົງມືເຮັດເພື່ອຄວາມສຳເລັດຂອງຕົວເອງ.

ເໜືອສິ່ງອື່ນໃດກໍ່ຄືຕົວທ່ານເອງ ຖ້າບັງຄັບໃຫ້ຕົວເອງໃຫ້ເລີກພຶດຕິກຳພວກນີ້ໄດ້ ວັນໃດວັນໜຶ່ງ ຄວາມສຳເລັດຈະຕ້ອງເຂົ້າມາຫາທ່ານ ແລະ ຈະບໍ່ມີຄໍາວ່າ “ບໍ່ປະສົບຄວາມສຳເລັດ” ອີກຕໍ່ໄປ.

4 ຂັ້ນຕອນທີ່ຈະເຮັດໃຫ້ການຕັ້ງເປົ້າໝາຍສຳເລັດໂດຍໄວ

ເປັນຫຍັງເປົ້າໝາຍມີຄວາມສຳຄັນກັນໜັກໜາ? ແລະ ຖ້າຊີວິດບໍ່ມີເປົ້າໝາຍຈະເປັນແນວໃດ? 

ລອງມາເບິ່ງວິທີການຕັ້ງເປົ້າໝາຍທີ່ ທ່ານ Brendon ໄດ້ສອນເຕັກນິກການຕັ້ງເປົ້າໝາຍແບບ DUMB Goals (Dreams, Uplifting, Method & Behavior) ຫຼືຖ້າເວົ້າອີກແບບກໍ່ແມ່ນເປົ້າໝາຍແບບໂງ່ໆ ໄວ້ 4 ຂັ້ນຕອນດັ່ງນີ້:

ຂັ້ນທີ 1: Dreams ຂຽນຄວາມຝັນຂອງທ່ານລົງໄປ

       ລອງຫຼັບຕາລົງຈັກຫ້າວິແລ້ວນຶກຂຶ້ນມາວ່າຊີວິດໃນຄວາມຝັນຂອງທ່ານມີຮູບຮ່າງໜ້າຕາເປັນແນວໃດ? ຊີວິດແບບໃດທີ່ທ່ານມີຄວາມກະຕືລືລົ້ນທີ່ຈະໄຂວ່ຄວ້າມັນມາຄອບຄອງ ? ຈາກນັ້ນກໍ່ຂຽນມັນລົງປຶ້ມບັນທຶກ ແລ້ວວິທີການທີ່ຍັງບໍ່ທັນມີມັນຈະປະກົດຂຶ້ນມາໃຫ້ເຫັນເອງ ນີ້ຄືຈຸດເລີ່ມຕົ້ນທຳອິດຂອງການດຶງດູດຄວາມສຳເລັດ !!!. ໃຫ້ຄວາມຝັນ...ຂັບເຄື່ອນ ແລະ ເປັນພະລັງທີ່ຍິ່ງໃຫຍ່ໃຫ້ກັບທ່ານ.

ຂໍ້ແນະນຳ:​ ຈົ່ງຂຽນຄວາມຝັນໃນຮູບປະໂຫຍກປະຈຸບັນ, ອາດຈະຂຽນໃນຮູບກາບັນຍາຍ ເຊິ່ງຈະເຮັດໃຫ້ທ່ານຮູ້ສຶກສາວ່າເໝືອນໄປຢູ່ບ່ອນນັ້ນແລ້ວ ແລະ ໄດ້ສຳຜັດມັນແລ້ວ ທີ່ສຳຄັນຢ່າຕີກອບຄວາມຝັນໃຫ້ຄັບແຄບຈົນເກີນໄປ.

ຂັ້ນທີ 2: Uplifting ຍົກລະດັບຊີວິດ

        ທ່ານຈະຍົກລະດັບຊີວິດໄປໃນທິດທາງໃດ? ທ່ານຕ້ອງການໃຫ້ຫຍັງເກີດຂຶ້ນກັບຊີວິດຂອງທ່ານ?

ຫຼັງຈາກທີ່ໄດ້ຂຽນຄວາມຝັນຂອງທ່ານລົງໄປແລ້ວ ຕອນນີ້ກໍ່ເຖິງເວລາຂຽນສິ່ງທີ່ທ່ານຕ້ອງການໃຫ້ມັນຊັດເຈນລົງໄປອີກ.​ ຂຽນໃນສິ່ງທີ່ທ່ານເຊື່ອວ່າມັນຈະເປັນ “ເສັ້ນທາງໄປສູ່ຊີວິດໃນຝັນຂອງທ່ານ”.

ຂໍ້ແນະນຳ: ຂຽນໃນສິ່ງທີ່ຕ້ອງການເທົ່ານັ້ນ, ໃຊ້ຄໍາເວົ້າທີ່ເວລາອ່ານແລ້ວມີພະລັງ ມີໄຟ ແລະ ແຮງບັນດານໃຈ ແຕ່ຢ່າລືມຂຽນໃຫ້ມັນເຊື່ອມໂຍງກັບຄວາມຝັນຂອງທ່ານດ້ວຍ.

ຂັ້ນທີ 3: Method ເລືອກວິທີການ

ເມື່ອຮູ້ຊັດເຈນວ່າຄວາມຝັນແມ່ນຫຍັງ? (ຜູ້ຂຽນກາຍັງບໍ່ຮູ້ຄືກັນ) ແລະ ກໍ່ໄດ້ກໍານົດທິດທາງວ່າຈະຍົກລະດັບຊີວິດໄປທາງໃດ? ເຊິ່ງໝາຍເຖິງການເລືອກວິທີການ ແລະ ທັກສະທີ່ທ່ານຈະຕ້ອງຝຶກຝັນຈົນເກີດຄວາມຊຳນິຊຳນານ ເພາະຄວາມສຳເລັດ ຄືຜົນລັບສຳລັບຄົນທີ່ມີຂອງເຈັ໋ງໆ ເທົ່ານັ້ນ.

ຂໍ້ແນະນຳ: ຂຽນສິ່ງທີ່ທ່ານຈະຝຶກຝົນ, ຝຶກຝົນ ແລະ ຝຶກຝົນ. ເປົ້າໝາຍຂອງການຂຽນ “ວິທີການ” ກໍ່ຄື “ການເພີ່ມທັກສະທີ່ຈໍາເປັນໃຫ້ຕົວທ່ານເອງ”.

ຂັ້ນທີ 4: Behavior ຝຶກນິໄສໃໝ່

       ຖືວ່າເປັນພື້ນຖານສຳຄັນຂອງການຕັ້ງເປົ້າໝາຍແບບ DUMB (ແບບໂງ່ໆອີກຫັ້ນລະ) ເພາະວ່າ “ນິໄສ” ຄືຮາກຖານຂອງທຸກໆຜົນລັບໃນຊີວິດ. ໃນຂັ້ນນີ້ທ່ານຂຽນເຖິງນິໄສທີ່ທ່ານຕ້ອງການຝຶກຝົນ, ນິໄສທີ່ມັນຈະສະໜັບສະໜູນໃຫ້ທ່ານບັນລຸທຸກໆເປົ້າໝາຍຂອງທ່ານ ເຊັນ: ຝຶກນິໄສໃຫ້ມີຈຸດສຸມ (Focus) ເຖິງຄວາມຝັນທີ່ຊັດເຈນຢູ່ສະເໝີ, ຝຶກນິໄສການເຮັດວຽກຢ່າງມີປະສິດທິພາບ, ຝຶກນິໄສຂອງການເປັນຄົນໃຈເຢັນ ແລະ ນິ້ງສະຫງົບ.

ຂໍ້ແນະນໍາ: ລະບຸນິໄສທີ່ຈະເປັນປະໂຍດຕໍ່ການບັນລຸເປົ້າໝາຍຂອງທ່ານ ແລະ ຊອກຫາວິທີການທີ່ຈະເຊື່ອມໂຍງນິໄສໃໝ່ກັບກິດຈະກຳທີ່ທ່ານເຮັດເປັນປົກກະຕິ.

ບໍ່ມີຄວາມສຳເລັດໃດທີ່ເກີດຂຶ້ນໂດຍທີ່ປາສະຈາກການລົງມືທຳ. ຖ້າຂຽນແລ້ວລືມ, ຂຽນແລ້ວໃຫ້ໝາຄາບໄປແດກ, ຂຽນແລ້ວເອົາມ້ຽນເທິງຫົວນອນບໍ່ເຄີຍຈະເອົາມານຳໃຊ້ ວິທີການທີ່ຂຽນເປົ້າໝາຍໂຄດດີຊ່ຳໃດກໍ່ບໍ່ມີວັນທີ່ຈະນຳທ່ານໄປສູ່ຄວາມສຳເລັດໄດ້.

ຜົນຂອງການເຮັດວຽກ ຂຶ້ນກັບທີ່ເຮົາຄິດ

ຊີວິດຂອງຄົນເຮົາຈະລົ້ມ ຫຼື ລຸກ ລ້ວນແຕ່ມາຈາກຄວາມຄິດໃນໃຈເຮົາ, ການສ້າງຄວາມເຊື່ອ ແລະ ບອກກັບໂຕເອງວ່າເຮົາສາມາດປະສົບຄວາມສໍາເລັດໄດ້ ເຮົາກໍ່ຈະເຮັດສິ່ງນັ້ນໄດ້.

ຈົ່ງຕັດຄວາມເຊຶ່ອ ຫຼື ຄໍາແນະນໍາຂອງຄົນອື່ນ ທີ່ມີແຕ່ຈະບັນທອນຈິດໃຈ ຈົນເຮັດໃຫ້ເຮົາປະສົບແຕ່ຄວາມປະລາໄຊ,
ບອກໂຕເອງວ່າເຮົາສາມາດເຮັດໃຫ້ມັນສໍາເລັດລົງໄດ້.

ຄົນທີປະສົບຄວາມສໍາເລັດຈົນເຮັດໃຫ້ໂລກຈົດຈໍານັ້ນ ເພາະເຂົາມີຄວາມເຊື່ອວ່າເຂົາສາມາດເຮັດມັນໄດ້ຢ່າງແນ່ນອນ.

ທ່ານກໍ່ເຊັ່ນກັນ ທ່ານເຮັດໃຫ້ມັນສໍາເລັດໄດ້ ກໍ່ຂຶ້ນກັບຄວາມຄິດຂອງທ່ານ ແລ້ວເຮັດໃຫ້ມັນບັນລຸເປົ້າໝາຍ ຕາມຄວາມມຸ່ງຫວັງ

ວິທີປຸກພະລັງແຫ່ງຄວາມເຊື່ອ 3 ປະການ

ການທີ່ຈະປຸກພະລັງແຫ່ງຄວາມເຊື່ອທີ່ຍັງຄົງບົ່ມຊ້ອນ ຫຼື ຫຼັບໃຫຼຢູ່ນັ້ນ ໃຫ້ຟື້ນຄືນຊີບມີຊີວິດຊີວາຂຶ້ນມາ ໃຫ້ແຂງແກ່ງ ມີ 3 ປະການດັ່ງນີ້:

1. ຄິດວ່າຕ້ອງສຳເລັດ ຢ່າຄິດວ່າຈະລົ້ມເຫຼວ: ເມືອປະສົບບັນຫາ ຄົນເຮົາຈະມີສອງຄວາມຄິດ ຄື ຊະນະ ແລະ ຜ່າຍແພ້ ຈົ່ງເລືອກເອົາຄວາມຄິດທີ່ຈະຊະນະ ເພື່ອຊີ້ນຳຄວາມຄິດ ແລະ ຄວບຄຸມຈິດໃຈເຮົາໃຫ້ຄິດແຜນ ແລະ ກົນລະຍຸດ ໃນການແກ້ບັນຫາໃຫ້ສຳເລັດ.
2. ເຕືອນຕົວເອງວ່າເຮົາເກັ່ງກວ່າທີ່ເຮົາຄິດ: ຄົນທີ່ປະສົບຄວາມສຳເລັດ ບໍ່ແມ່ນວ່າເຂົາຈະມີສະໝອງທີ່ດີເລີດ ຫຼື ຍ້ອນບຸນວາດສະໜາ ແຕ່ເປັນຜົນມາຈາກການພັດທະນາຄວາມເຊື່ອໝັ້ນໃນໃຈຕົນເອງ ແລະ ເຮັດຕາມນັ້ນ. ຈົ່ງຢ່າຍອມຮັບ ຫຼື ສະແດງໃຫ້ໃຜເຫັນວ່າ ທ່ານເປັນຄົນກະຈອກເປັນອັນຂາດ.
3. ຄິດໃຫ້ໃຫຍ່: ຂະໜາດຂອງຄວາມສໍາເລັດເປັນຜົນມາຈາກຄວາມຄິດ ຄິດໃຫຍ່ກໍ່ຈະໄດ້ຮັບຄວາມສຳເລັດທີ່ຍິ່ງໃຫຍ່ ຈົ່ງຈື່ໄວ້ວ່າ ຄວາມຄິດໃຫຍ່ ແລະ ແຜນການອັນຍິ່ງໃຫຍ່ປົກກະຕິແລ້ວ ຈະເຮັດໄດ້ງ່າຍກວ່າ ຄວາມຄິດນ້ອຍ ແລະ ແຜນການອັນນ້ອຍ.

ຈົ່ງພັດທະນາຕົວເອງເພື່ອສ້າງຄວາມພ້ອມໃນການທີ່ຈະກ້າວໄປຂ້າງໜ້າຢ່າງສະຫງ່າງາມ.

ປຸກຄວາມເຊຶ່ອໝັ້ນໃນໃຈຕົວເອງຂຶ້ນມາ

ຄວາມບໍ່ປະສົມຜົນສໍາເລັດໃນຊີວິດສ່ວນໃຫຍ່ເພາະບໍ່ໝັ້ນໃຈໃນສິ່ງທີ່ກໍາລັງເຮັດ, ຄົ້ນຫາຕົວເອງບໍ່ພົບ, ເຮັດໃຫ້ໃຊ້ຊີວິດໄປຕາມມີຕາມເກີດ ເຮັດຕາມຄົນອຶ່ນສັ່ງໂດຍບໍ່ມີເງື່ອນໄຂ (ຄືກັບຜູ້ຂຽນໃນປັດຈຸບັນ).

ຄົນທີ່ເຊື່ອໝັ້ນໃນຕົວເອງ ເຂົາຮູ້ວ່າເປົ້າໝາຍຊີວິດແມ່ນຫຍັງ ແລະ ວາງແຜນລົງມືເຮັດມັນຢ່າງໝັ້ນໃຈ.

ເມື່ອມີສິ່ງໃດທີ່ເຂົ້າມາບັ່ນທອນຄວາມເຊື່ອໝັ້ນໃນໃຈເຂົາ ເຂົາຈະໃຊ້ເຫດຜົນເພື່ອໄຈ້ແຍກມັນ ຖ້າບໍ່ມີປະໂຫຍດຫຍັງ ເຂົາຈະຂວ່າງມັນຖິ້ມຢ່າງບໍ່ໄດ້ສົນໃຈໄຍດີ ເພາະສິ່ງເຫຼົ່ານັ້ນ ມີແຕ່ຈະມາວຸ້ນວາຍຈິດໃຈເຂົາເທົ່ານັ້ນ.

7 ວິທີການເຮັດໃຫ້ເປົ້າໝາຍຊີວິດສຳເລັດຜົນ

1. ຕັດສິນໃຈໃຫ້ໄດ້ວ່າທີ່ຈິງແລ້ວຊີວິດຂອງເຮົາຕ້ອງການຫຍັງ: ຄິດທົບທວນວ່າທີ່ຈິງແລ້ວຕົນເອງເກີດມາເພື່ອຫຍັງ, ຕ້ອງການເຮັດຫຍັງໃຫ້ສຳເລັດ, ຢາກເປັນຫຍັງ ບາງຄົນຕ້ອງການເປັນນັກທຸລະກິດ, ມີທຸລະກິດເປັນຂອງຕົນເອງ, ຢາກເປັນນັກບັນຍາຍ, ຢາກເປັນນັກຮ້ອງ...ຈົງເຊົາເຮັດຕາມສິ່ງທີ່ຄົນອື່ນຢາກໃຫ້ເຮົາເຮັດ ຫຼື ຢາກໃຫ້ເຮົາເປັນ ເພາະມັນບໍ່ແມ່ນສິ່ງທີ່ອອກມາຈາກຈິດວິນຍານທີ່ແທ້ຈິງຂອງເຮົາ.
2. ຂຽນບັນທຶກໃນສິ່ງທີ່ຕ້ອງການ: ຂຽນສິ່ງທີ່ເຮົາຕ້ອງການຢາກຈະເປັນຢາກຈະມີ ອາດຈະຂຽນໄວ້ໃນປື້ມບັນທຶກປະຈໍາວັນ, ຂຽນໃສ່ເຈັ້ຍ ແລ້ວຕິດໄວ້ຝາຫ້ອງນອນ ຫຼື ປະຕູບ່ອນທີ່ເຫັນໄດ້ງ່າຍເພື່ອເຕືອນຄວາມຊົງຈໍາ ຫຼື ອາດຈະພິມລົງຄອມ, ຂຽນລົງ Blogger (ຈະໂພດສ໌ ຫຼື ພຽງແຕ່ບັນທຶກໄວ້ກໍ່ໄດ້) ຫຼື ຂຽນໄວ້ແອັບບັນທຶກໃນໂທລະສັບກໍ່ໄດ້ ແລ້ວກັບມາອ່ານທົບທວນເບິ່ງໃນມື້ຕໍ່ມາ ຫຼື ອາທິດຕໍ່ມາ ຫຼື ປີຕໍ່ມາ ວ່າສິ່ງທີ່ເຮົາບັນທຶກລົງໄປນັ້ນແມ່ນສິ່ງທີ່ເຮົາຕ້ອງການແທ້ຫຼືບໍ່ ຫຼື ເປັນພຽງຄວາມຕ້ອງການໃນຊົ່ວຄັ້ງຊົ່ວຍາມ ແລະ ຖ້າຫາກແມ່ນສິ່ງທີ່ເຮົາຕ້ອງການແທ້ໆ ເວລາເຮົາທົບທວນບັນທຶກແຕ່ລະຄັ້ງເຮົາຈະຮູ້ໄດ້ວ່າມັນເປັນສິ່ງທີ່ເຮົາຢາກໄດ້ມັນມາແທ້ ແລະ ຈະເກີດຄວາມພະຍາຍາມເຮັດທຸກສິ່ງເພື່ອໃຫ້ໄດ້ມັນມາ.
3. ກຳນົດເວລາໃຫ້ກັບເປົ້າໝາຍ: ເມື່ອຮູ້ເປົ້າໝາຍຊີວິດທີ່ແທ້ຈິງແລ້ວ ຈົ່ງກຳນົດເວລາໃຫ້ກັບມັນໃນການທີ່ຈະເຮັດໃຫ້ເປົ້າໝາຍສໍາເລັດໃນແຕ່ລະໄລຍະ ອາດຈະກຳນົດເປັນລາຍວັນ,​ ລາຍອາທິດ, ລາຍເດືອນ, 6 ເດືອນ, 1ປີ, 3ປີ, 5 ປີ ແລະ 10 ປີ. ຢ່າປ່ອຍໃຫ້ຄວາມສໍາເລັດຂື້ນກັບໂຊກຊະຕາ ຫຼື ວາດສະໜາຢ່າງດຽວ ແຕ່ໃຫ້ເວລາເປັນຕົວກຳນົດຂອບເຂດໃນການກະທໍາສູ່ຄວາມສຳເລັດ.
4. ກວດເບີ່ງວ່າເຮົາຈະໄປເຖິງເປົ້າໝາຍໄດ້ແນວໃດ: ອ່ານທົບທວນສິ່ງທີ່ໄດ້ບັນທຶກໃນແຕ່ລະວັນ ເພື່ອເປັນການຕອກຢ້ຳຈິດໃຕ້ສໍານຶກ, ທໍາມະຊາດຂອງມະນຸດຈະມີເປົ້າໝາຍຫຼັກພຽງເປົ້າໝາຍດຽວ ຈົ່ງພະຍາຍາມຫາວິທີໃຫ້ເປົ້າໝາຍບັນລຸຜົນໂດຍການຊອກຮູ້ຮ່ຳຮຽນ, ຫາຂໍ້ມູນ, ຮຽນເພີ່ມ, ຝຶກອົບຮົມ,​ ປຶກສາຜູ້ຮູ້, ໃຫ້ເວລາກັບຕົວເອງເພື່ອຄົ້ນຄິດ ແລ້ວຄວາມຄິດ (Idea) ດີໆ ເຈັງໆກໍ່ຈະອອກມາເອງ.
5. ຈັດການວາງແຜນກ້າວໄປຫາເປົ້າໝາຍ: ວາງແຜນງານວ່າຈະເຮັດອັນໃດກ່ອນ ອັນໃດຕາມຫຼັງໂດຍອີງໃສ່ເວລາວ່າມື້ອື່ນຈະເຮັດຫຍັງ, 3 ວັນຕໍ່ໜ້າ, ອາທິດໜ້າ ຫຼື ເດືອນໜ້າຈະເຮັດຫຍັງຕໍ່ ໂດຍວາງລໍາດັບເປັນຂັ້ນເປັນຕອນ ມັນອາດຈະໃຊ້ເວລາຍາວນານເປັນເດືອນເປັນປີແຕ່ການວາງແຜນໃຫ້ກັບເປົ້າໝາຍຈະຊົງພະລັງຢ່າງເຫັນໄດ້ຊັດເຈນ.
6. ລົງມືປະຕິບັດໃຫ້ເຖິງເປົ້າໝາຍ: ສ້າງນິໄສໃຫ້ເປັນຄົນລົງມືເຮັດ ແລະ ມີຄວາມຕັ້ງໃຈເຮັດໃຫ້ມັນສຸດກົກສຸດປາຍໄປສູ່ເປົ້າໝາຍ ຢ່າໄດ້ໃສ່ໃຈກັບຄໍາຫົວເລາະເຢາະເຍີ້ຍຂອງຄົນຮອບຂ້າງ ບາງທີ່ອາດຈະມາໃນຮູບຂອງຄົນທີ່ຫວັງດີກັບເຮົາ ແຕ່ເມືອເປົ້າໝາຍທີ່ມີໃນຫົວໃຈຂອງເຮົາມັນຊັດເຈນແລ້ວຈົ່ງຢ່າໄປເສຍເວລາກັນມັນ, ຢ່າໃຫ້ມັນມາບັນທອນກຳລັງໃຈຂອງເຮົາ, ອຸປະສັກເປັນສິ່ງທີ່ທົດສອບຄວາມເຂັ້ມແຂງ, ຂວາກໜາມຕຳແລ້ວເຈັບໃຫ້ຖືເປັນບົດຮຽນ.
7. ສ້າງຄວາມສຳເລັດໃຫ້ຕໍ່ເນື່ອງ: ເມືອສຳເລັດເປົ້າໝາຍທີ່ຂຽນໄວ້ແລ້ວຈົ່ງພັດທະນາໃຫ້ມັນດີເລີດກວ່າເກົ່າຈົ່ງຢ່າໄດ້ຢຸດເຊົາເພື່ອທີ່ຈະວາງເປົ້າໝາຍຕໍ່ໄປເພື່ອຮັກສາເປົ້າໝາຍທີ່ມີ ຢ່າຟ້າວດື່ມດ່ຳເກັບຄວາມສຳເລັດເທື່ອ ຢ່າໃຫ້ເປັນເໝືອນ "ແມ່ທັບທີ່ເສຍໄຊໃຫ້ສົງຄາມຍ້ອນໄຊຊະນະຄັ້ງທໍາອິດ".

ຢ່າໃຫ້ຄວາມຝັນຂອງທ່ານຕາຍແຕ່ຍັງບໍ່ທັນໄດ້ເລີ່ມ

ທ່ານມັກເປັນຄືກັນບໍ່ ເວລາທີ່ຄິດອອກໄອເດຍ (Idea) ສຸດເຈັງ ເປັນຄວາມຄິດທີ່ບັນເຈີດວ່າຊັ້ນເທາະ ທີ່ຢາກລົງໄມ້ລົງມື ເຮັດຫຍັງອັນໃດອັນໜຶ່ງ ພໍເປັນຊິ້ນເປັນອັນ ແລ້ວລອງໄປເວົ້າໃຫ້ຄົນອື່ນຟັງ ບໍ່ວ່າຈະເປັນຄົນຮັກ, ຄົນໄວ້ໃຈ, ຍາດໃກ້ສິດ, ພໍ່ແມ່, ເພື່ອນຮັກ... ເພື່ອໃຫ້ເຂົາເຫັນດີນຳ ແລະ ສະໜັບສະໜູນຄວາມຄິດຂອງເຮົາ ແຕ່ຮູ້ບໍ່ວ່າຜົນຕອບແທນທີ່ໄດ້ມັນຊ່າງໜ້າຜິດຫວັງເປັນສ່ວນໃຫຍ່ ແລະ ບໍ່ເຄີຍທີ່ຈະມີຂໍ້ສະເໜີ ຫຼື ຂໍ້ແນະນຳທາງດ້ານບວກຈັກຄໍາ ຄືກັບວ່າຊູໝາກບານໃຫ້ເຂົາກຸບໃສ່ໜ້າເຮົານີ້ລະ ແລະ ນັ້ນລະຄືຜູ້ເປັນຄາດຕະກອນສັງຫານຄວາມຝັນຂອງເຮົາ ເຮັດໃຫ້ຄວາມຝັນຂອງເຮົາມັນຕາຍແຕ່ຍັງບໍ່ທັນໄດ້ເລີ່ມເປັນຕົວເປັນຕົນ.

ສະນັ້ນ, ເມືອໃດຫາກທ່ານມີຄວາມຄິດທີ່ດີແລ້ວພຽງແຕ່ເກັບມັນໄວ້ໃນໃຈອີກບໍ່ດົນມັນກໍ່ຄົງລືມ. ທາງທີ່ດີທີ່ສຸດກໍ່ຄື ຈົ່ງຂຽນມັນອອກມາທັນທີ່ເພື່ອເນັ້ນຢ້ຳເຮັດໃຫ້ມັນເປັນຮູບຮ່າງໃນສະໝອງ ເຮັດໃຫ້ມັນຊັດເຈນເປັນຮູບປະທຳ ຈາກນັ້ນຈຶ່ງກຳນົດແຜນການທີ່ຈະເຮັດໃຫ້ມັນສຳເລັດ, ກໍານົດເວລາໃນການເຮັດມັນແຕ່ລະຂັ້ນ.

ເປົ້າໝາຍທີ່ຍິ່ງໃຫຍ່ແມ່ນຕ້ອງໃຊ້ເວລາທີ່ຍາວນານໃນການເຮັດໃຫ້ສຳເລັດ, ແຕ່ການບັນລຸເປົ້າໝາຍອັນເລັກນ້ອຍໄປເທື່ອລະຂັ້ນສຸດທ້າຍເປົ້າໝາຍທີ່ໃຫຍ່ນັ້ນກໍ່ສໍາເລັດໄດ້ ປຽບເໝືອນທີ່ເຮົາຂຶ້ນບັນໄດ້ເທື່ອລະຂັ້ນ ສັນໃດກໍ່ສັນນັ້ນ.

ຈົ່ງເຮັດໃຫ້ຄວາມມັກກາຍເປັນຄວາມຖະໜັດ ຫຼັງຈາກນັ້ນ, ຈຶ່ງປ່ຽນຄວາມຖະໜັດໃຫ້ກາຍເປັນລາຍໄດ້ ແລ້ວທ່ານຈະປະສົບກັບຄວາມສຸກ ແລະ ຄວາມສຳເລັດໄປພ້ອມໆກັນ.

ອາຊີບໃນປັດຈຸບັນບໍ່ໄດ້ຈໍາກັດພຽງແຕ່ໃນສຳນັກງານອົງການ ຫຼື ເຮັດໃນບໍລິສັດ ມີຫົວໜ້າ ມີລູກນ້ອງ ມີຕຳແໜ່ງ ມີແຜນວຽກທີ່ກຳນົດມາຕາຍຕົວຕາມເປົ້າປະສົງຂອງອົງກອນ. ການທີ່ມີລາຍໄດ້ບໍ່ຄຸ້ມກັບເວລາທີ່ທຸ້ມເທໄປ ໃນຂະນະທີ່ເຮັດວຽກຢູ່ກໍ່ບໍ່ມີຄວາມສຸກ, ມີຄວາມກົດດັນ, ກຳນົດຄວາມຝັນຂອງຕົນເອງບໍ່ໄດ້, ຄວາມຫວັງເປັນພຽງອາກາດປິວນຳພາຍຸ, ລາຍຮັບພໍແຕ່ປະທັງຊີວິດ ແລ້ວຈະເອີ້ນອາຊີບໄດ້ແນວໃດ? ຍາມໃດຈະມີອິດສະຫຼະພາບທາງການເງິນ?, ມີລາຍຮັບພຽງພໍຕໍ່ກັບຄ່າຄອງຊີບ, ຕໍ່ກັບການດຳເນີນຊີວິດເພື່ອຢູ່ລອດໃນສັງຄົມ, ຍາມໃດຈະມີເວລາເປັນຂອງຕົນເອງ? ຍາມໃດຈະເຖິງເວລາທີ່ຈະເຮັດໃຫ້ເປົ້າໝາຍທີ່ເຮົາກຳນົດເອງປະສົບຄວາມສຳເລັດ.

ອາຊີບໃນຍຸກປັດຈຸບັນ ແລະ ຍຸກອະນາຄົດມັນຂື້ນຢູ່ກັບຄວາມມັກ ແລະ ຄວາມຖະໜັດຂອງບຸກຄົນ ທີ່ຈະເປັນຄົນກຳນົດ ເປັນຄົນອອກແບບໃຫ້ເປັນໄປຕາມທີ່ໃຈມັກ ເພື່ອສ້າງລ້າຍໄດ້ລ້ຽງຊີບທີ່ພຽງພໍ ແລະ ພົບກັບຄວາມສຸກທີ່ແທ້ຈິງ ເຊິ່ງອາດແບ່ງໄດ້ໃນສາມລັກສະນະດັ່ງນີ້:

1. ສິ່ງທີ່ເຮົາເຮັດແລ້ວມີຄົນສະໜັບສະໜູນໃຫ້ທ່ານເຮັດອີກ: ເປັນຕົ້ນແມ່ນການແຕ່ງກິນ, ການເຮັດເຂົ້າໜົມ, ການແນະນຳ, ການໃຫ້ຄຳປຶກສາແກ່ໝູ່ເພື່ອນ...,​ ນັ້ນລະ ອາດຈະເປັນອາຊີບສ້າງລາຍໄດ້ໃຫ້ທ່ານ ທ່ານຈົງພັດທະນາຝຶກຝົນໃຫ້ມີສີມືໃຫ້ກາຍເປັນຄວາມຖະໜັດ ມັນຈະກາຍເປັນອາຊີບໃຫ້ທ່ານ.

2. ຈຸດແຂງຂອງເຮົາມີປະໂຫຍດຕໍ່ຄົນອື່ນ: ຖ້າທ່ານມັກຂຽນນັ້ນຂຽນນີ້, ມັກແຕ່ກອນ ແຕ່ງເພງ ກໍ່ພັດທະນາຕົນເອງໃຫ້ກາຍເປັນນັກຂຽນ ຫຼື ນັກແຕ່ງເພງ, ຖ້າທ່ານມັກອ່ານ, ມັນສະແຫວງຫາຄວາມຮູ້ ກໍ່ສ້າງໃຫ້ຕົນເອງເປັນຄົນຖ່າຍທອດຄວາມຮູ້ໃຫ້ຄົນອື່ນ ນັ້ນລະມັນຈະເປັນອາຊີບ ກໍ່ຄືການເປັນຄູ, ການເປັນນັກບັນຍາຍ ຫຼື ເຮັດທຸລະກິດກ່ຽວກັບການຂາຍຄວາມຮູ້ ຫຼື ມີຄຳເອີ້ນໃນພາສາອັງກິດວ່າ Infopreneur. ນອກຈາກນີ້, ຍັງມີອີກຫຼາຍໆຢ່າງທີ່ຂື້ນກັບຄວາມມັກຄື: ຖ້າທ່ານມັກລ້ຽງສັດ ກໍ່ລ້ຽງສັດດັ່ງກ່າວໃຫ້ເປັນອາຊີບສະເລີຍ: ຄືລ້ຽງຂາຍພໍ່ແມ່ພັນ, ເພາະພັນລູກນ້ອຍຂາຍ ຫຼື ວາງສະແດງເພື່ອເກັບປີ້ເຂົ້າຊົມ..., ມັກປູກຜັກ, ມັກປູກຕົ້ນໄມ້ ເປັນຄົນຮັກທຳມະຊາດ ກໍ່ເຮັດສວນປູກຜັກຂາຍ, ເຮັດສວນກະເສດເພື່ອໃຫ້ຄົນເຂົ້າຊົມພ້ອມທັງຂາຍຜົນຜະລິດກະສິກຳ, ເພາະພັນຕົ້ນໄມ້ຂາຍ, ເປັນຄົນຕົບແຕ່ງສວນ ຫຼື ຈັດສວນ ຕະຫຼອດເຖິງການອະນຸລັກປ່າແລ້ວສ້າງໃຫ້ເປັນແຫຼ່ງທ່ອງທ່ຽວໄປເລີຍ; ຫຼືຖ້າເປັນຄົນມັກຈັດງານ Party ມ່ວນ ທີ່ມີໝູ່ມາຮ່ວມງານນຳແລ້ວບອກໃຫ້ຈັດອີກເທື່ອໜ້າເທື່ອໃນ ກໍ່ພັດທະນາໃຫ້ມັນເປັນອາຊີບກໍ່ໄດ້ ເວົ້າລວມກໍ່ຄືເຮົາມັກສິ່ງໃດກໍ່ລອງຫາຄວາມເປັນໄປໄດ້ວ່າເຮົາຈະຫາລາຍໄດ້ຈາກມັນໄດ້ບໍ່.

3. ອາຊີບໃນອະນາຄົດມັກຈະບໍ່ມີຄຳວ່າອາຊີບ ຫຼື ຕຳແໜ່ງ ເພາະເມື່ອໃດຫາກມີຕຳແໜ່ງນັ້ນສະແດງວ່າ: ປະການໜຶ່ງ ທ່ານມີຄູ່ແຂ່ງ ກໍ່ຄືມີຄົນຈ້ອງຊິງດີຊີງເດັ່ນຈະມາສູ້ຍັນກັບທ່ານ; ປະການທີ່ສອງ ລາຍໄດ້ຂອງທ່ານມີທາງຕັນ ກໍ່ຄື ເງິນເດືອນຂອງທ່ານຖືກກຳນົດມາຕາຍຕົວແລ້ວ; ປະການທີ່ສາມ ສ່ວນໃຫຍ່ແລ້ວບໍ່ມີເຄຣດິດໃນຜົນງານ ກໍ່ຄືເຖິງວ່າທ່ານຈະເຮັດກັບມືມັນກໍ່ເປັນຜົນງານລວມຂອງອົງກອນ ຫຼື ອາດຈະເປັນຂອງເພື່ອນຮ່ວມງານ ຫຼື ບໍ່ກໍ່ເປັນຜົນງານຂອງບຸກຄົນທີ່ມີຕຳແໜ່ງສູງກວ່າທ່ານ ຫຼື ບໍ່ກໍ່ຂ້າມຂັ້ນຂື້ນໄປອີກ.